ADIERAZI EH! ekimenak datorren irailaren 11an eskubide zibil eta politikoen aldeko manifestazio nazionala deitu du. Mobilizazioa Bilbon burutuko dute eta bertara joateko Euskal Herriko eragile guztiei gonbidapena luzatu die.

ADIERAZI EH! ekimenaren ustez Euskal Herriak oso une garrantzitsuan murgilduta dago. Alde batetik eskubideen urraketa oso zabala eta kezkagarria delako eta beste aldetik Euskal Herriko gehiengo zabal bat osatzen ari delako egoera honi buelta emateko eta benetako eskenatoki demokratikoa erdiesteko.

Dagoeneko eragile askok manifestazioarekin bat egin dute. Haien artean, ETXERAT! erakundeak agerraldi publikoa egin du manifestazioan parte hartzeko dei eginez. "Herri honetan, eskubide guztien errespetatzerantz pausoak ematea urgentziazko zeregina dela deritzogu, eta horretarako konpromiso eta tresna berriak sortu behar dira. “Adierazi EH”-k hasi du bidea, eta guk bide horretan parte aktiboa izango gara" aipatu dute. Manifestazioaren garrantzia azpimarratzeko hau esan dute: "Manifestazio hau benetako aldaketa hasteko baliagarri izan dadin, Etxeratek parte hartzera animatu nahi du herritar oro, eta bereziki, deialdi bat egin nahi diegu mota guztietako eragileei, benetako konpromisoak har ditzaten, egoera berri bat sortzeko."