HERRIRA mugimenduak Sopelan duen herri bilguneak deia egin du bihar presoen aldeko azken ostiralean parte hartzeko. Oraingo honetan pilotalekuaren aurrean egingo dute, Athleticen futbol partiduaren inguruan antolatu diren ekimenak direla medio udaletxeko plaza beteta egongo delako.

Hau da deialdia egiteko zabaldu duten mezua:

Giza eskubideen errespetua, Euskal Presoak Euskal Herrira!

Ezer baino lehen, ostiralero bezala espetxeetarako bidaiari ekin dioten ehunaka senide eta laguni besarkada sentikor bat helarazi nahi diegu hemendik. Autobusez, trenez, autoz eta hegazkinez, asteko egun libreak probestuz, kilometroak atzean utzi eta preso denarekin ordubetetxo bat emateko bidaia luzeak egitera behartzen gaitu sakabanaketak oraindik orain.

Ondo iritsi gara. Kontuz ibili bueltan. Lasai etorri. Kasu eguraldiarekin. Muxu bat gure partez. Zer moduz aurkitu duzue? Antzeko sms-ak eta telefono deiak gurutzatuko dira asteburu honetan ere, eta sakabanaketaren ankerkeriari kementsu eta irribarrez aurre egiten saiatuko gara, askotan erraza ez izan arren.
 
Espetxe politika minaren sortzaile baino ez da, eta sufrimendu oro gainditzeko urratsak ematen ari garen uneotan espetxe politika honek eragiten duen mina noiz amaituko zain gaude herritar asko Euskal Herrian.
 
Giza eskubideen errespetuari zor zaizkion neurriak dira gaixoak askatzea, bizi osorako espetxe zigorrari amaiera ematea eta presoak Euskal Herrira ekartzea. Ondoren, bake eta konponbide egoeran sakontzeko beharrezkoa izango da giltzapean edo ihesean dauden herritarren egoerari konponbide egoki bat ematea. Bake eta konponbide egoera ez baita ulergarria herritarrak espetxean eta deserrian egotearekin.

Baina Madrileko eta Pariseko agintariek dituzte espetxeetako giltzak, eta gaur gaurkoz giltza hauek ondo gordeak dituzte batzuek nahiz besteek. Giltza hauek espetxeetako ateak irekitzeko erabili ditzaten bultzatu behar ditugu. Asko gara presoen eskubideen aldeko mezuari lotu gatzaizkionak, baina babes hau zabaltzea eta kalean erakustea beharrezkoa izango da agintariek jarrera alda dezaten.
 
Denok elkartu eta ekimen berriak antolatuz emango ditugu pauso txikiak. Eta pauso txiki askoren baturak osatuko du denak herrira ekarriko dituen urrats handia.
 
Milesker guztioi

Sopelako herri bilgunea