Ostiral honetan, maiatzak 7 eta Algortako Telletxen, arratsaldeko 20:00etan, "Torturarik ez! Ilegalizaziorik ez! Proiektu guztien garapenari bai" lelopean manifestazioa deitu dute. Manifestazio honekin duela hilabete batzuk Segi erakundearen aurka polizia espainiarrak burutu zuen sarekadaren ondorioak salatu nahi dituzte.

Sarekada horretan 34 gazte atxilotu zituzten. Inkomunikazioa pasatu ostean torturak salatu zituzten eta handik gutxira eskualdeko beste gazte bat atxilotu zuten. Inkomunikazioa eta gero gertukoek jakin izan zuten, gazte honek eskualdeko 10 gazteen zerrenda bat sinatzeko bere burua behartuta ikusi zuela eta hori dela eta Uribe Kostako 10 gazte horiek edozein unean atxilotuta izateko arriskuan daude.

Manifestazioa deitu dutenek, gazte hauek atxilotuta, torturatuta eta espetxeratuta izateko pairatzen ari diren arriskua salatu nahi dute eta aldi berean informazioa kaleratu nahi dute, une politikoaren arabera edozein poliziak sarekada bat egitea erabakitzen baldin badu, aurretiaz jendarteak errealitate hau jakin dezan.