Uztailaren 31ean "Euskal Presoak Euskal Herrira" aldarrikapena berriro zabaltzeko, ETXERAT! preso eta errepresaliatuen senideen eta lagunen elkarteak errepidetan mobilizazioak egiteko deia luzatu du.

Preso politikoen egoera oso latza dela azpimarratu dute. "Gure senideak etengabeko jazarpena ari dira bizitzen azken hilabeteotan. Horren seinale, azken aldian Euskal Preso Politikoek egin behar izan dituzten gose grebak. Bizi duten errealitate ankerraren seinale. Bakartzeak, jipoiak, mehatxuak, txantaje etengabeak, senide eta lagunon aurkako miaketa saiakerak, eta abar luze bat", salatu dute.

Dispertsioaren errealitatea zein den ere salatu egin dute. "710 euskal preso politikoetatik, ia guztiak Euskal Herritik kanpo daude, euren etxetatik 700 kilometrora bataz beste. Dispertsio politikak dirauen denbora honetan guztian, 21 euskal preso politiko hil dira eta 16 senide eta lagunek galdu dute bizia errepidean. Zifra beldurgarriak dira, sakabanaketa politikak suposatzen duen kostu ekonomikoa beldurgarria den bezala. Xantaia honek, urtean, kasik 15 miloi eurotako odoluste ekonomikoa dakar. Onartezina den xantai baten aurrean gaude. Xantaia presoei, xantaia senide eta lagunei eta xantaia mugimendu politiko eta sozial oso baten aurka."

Hitzordua, larunbatean, uztailak 31, eguerdiko 12etatik ordubatetara izango da. Urteroko legez, indarrean dagoen espetxe politika salatu eta Euskal Presoek, beren eskubideen jabe direla, Euskal Herrian bizi behar dutela aldarrikatuko dute. Uribe Kostakoentzat Ugaldebietara joateko deia egin dute.