San Pedroak hasi dira eta gaur Sopelan ikusi eta sentitu duguna aspalditik ez du parekorik. Koadrilen desfilea itzela izan da. 20 koadrila baino gehiago, jende andana pozarren desfileaz gozatzen, gazteak, helduak eta zaharrak espaloiak betetzen eta plazan eromen herrikoia eta parte hartzailea.

Koadrilek Alkatesaren bulegoa okupatu dute eta udaletxeko balkoitik auzokide guztiak jaiaren pozaz eta alaitasunez kutsatu nahian algara eta dantza lau haizeetara zabaldu dute. Koadrilak alkate kolektiboa bilakatu dira eta pregoia kolorez apaindu dute.

Miren Loizaga bertsolari Sopeloztarrak bertso arina, sentikorra eta jai girokoa bota eta gero, koadrilen pregoia irakurri dute. Parte hartzea, parekidetasuna, sexu erasorik ez, urrun daudenei arnasa eta gorantzi maitakorra eta jai herrikoiak. Hauek izan dira pregoiaren ideia nagusienak.

Dudarik gabe, aurten aldaketa nabaria izan da. Batzuei, 30 urtetan filosofia honen kontra buru belarri ekin dietenei, ez die graziarik egin eta amorratuta daude. Kartel antzuetan haien inpotentzia agerian utzi dute. Alferrik baina! Auzokidei ateak eta bideak zabaltzen zaizkienean gaur bezalako emaitza dotoreak eta txalogarriak lortzen dira. Sopela aldatzen ari da eta estilo zaharren nostalgikoei ez zaie batere gustatzen. Zorionak koadrilak! Zorionak jai Batzordea! Zorionak Udal Gobernua! Sopela aldatzen ari da eta hobera gainera. Jaiak gozatu! Hona hemen bideoa koadrilen jeitsierarekin eta pregoiarekin.

Adobe Flash Player not installed or older than 9.0.115!

Datorren ostegunean San Pedroei hasiera emango diegu eta gero eta gertuago daudela iragartzeko atzo Sopelako elkarte ezberdinen jai zapiak herriko kaleetan eskegi zituzten. Jai Batzorde herrikoiak aurten ekarri duen berrikuntzenetariko bat da eta dudarik gabe gure kaleak kolorez jantzi dituzte. Honekin batera txosnak dagoeneko eliza parean kokatuta daude eta Sopeloztar guztiengan jaien gosea suma daiteke. Beraz, datozen egunetan disfrutatzeko aukera izango dugu beheko berrian eskura duzuen jai egitarauarekin. Ondo pasa San Pedroetan!!

Halaxe da, Sopelako jaiak ate joka ditugu, Sanpedroak, Karmenak Larrabasterran, eta aurrerago Santa Mariñe eta Ander Deuna...

Hona hemen jaien egitaraua...eta jaien nondik norako guztiak gertutik jarraitzeko jo ezazue Sopelako jai batzordearen blogean.

Ondo pasa, gozatu eta ez daudenak gogoan, gurekin lehenbailehen egon daitezen desioarekin, jai alaiak, dibertigarriak, euskaldunak, parekideak, anitzak eta koloretsuak guztiontzat.

Sopelako Jai Batzordeak, ekainaren 28an hasiko diren herriko jaien aurkezpena egin du udaletxeko plazan. Bertan, Sopelako jaien berezitasunen berri emateaz gain, jaietako kartel lehiaketaren irabazleen izenak jakinarazi du; haur eta gazteen atalean: IRATI CORRALES , HUGO MAZARIEGOS eta MIKEL BOMMARITO izan dira irabazleak. Bestetik, maila nagusiko irabazleei dagokionez; CARLOS MEZOk egile sopeloztar onenaren saria jaso du eta ESTHER URIEN ordea, aurtengo kartel lehiaketaren irabazlea izan da.

Aurtengo jaien ezaugarri nagusiak, beren izaera parte-hartzailea eta anitza izango direla adierazi dute jai batzordeko kideek. Bestalde, jai euskaldunak, parekideak eta koloretsuak izateko apustua egiten dute. Horrela izanik, hainbat ekintza ezberdin batzen ditu aurtengo jai egitarauak. Honekin batera, jai batzordetik ere, jaietan gerta daitezkeen erasoak ekiditeko lan egingo dutela azpimarratu dute edozein motatako erasoak gaitzetsiz.

Jaietako egitaraua edota jaien inguruko argibide gehiago, Jai Batzordeko blogean ikusgai dago. Ondoren JARE taldeak Kepa Junkeraren laguntzarekin sortutako Sopelako jaien abestia aurkezten dizuegu;

Adobe Flash Player not installed or older than 9.0.115!