Sopelako Udala azken 30 urte hauetan ez bezala 2012ko aurrekontuak era parte hartzailean lantzen ari da. BILDUren Udal Gobernu Taldeak prozesu parte hartzaile hau martxan ipini zuen eta pozik egoteko motiboak badituzte. Sopelako lau gunetan Batzarrak burutu dituzte eta pasa den ostiralean Batzarra Orokorra burutu zuten. Guztira 200 auzokide baino gehiago zuzenean parte hartu dute eta gainera hitza hartu dute, balorazio eta proposamen ugari eginez.

Larrabasterran eta Sopelako erdigunean lehenengoak izan ziren. Gero Sopelmar eta Arriatera auzokoak etorri ziren. Bi auzo hauetan herritarrak ekimen honekin oso eskertuta agertu ziren. Ostiralean ia 100 herritar Kurtzioko Kultur Etxera bertaratu ziren eta ondorioak, balorapenak eta proposamenak ezagutu zituzten. Aurreko Batzarretan bezala proposamenak ugariak izan ziren.

Horretaz aparte, gutxienez, 380 inkesta batu dituzte eta oso ideia argiak atera dituzte aurrekontuen proposamenak egiteko orduan. Orain PNVrekin eta PSErekin negoziazioak bideratu behar dituzte aurrekontuak ahalik eta lasterren onartzeko. Hala eta guztiz ere, BILDUren gobernuak bere hitza bete du eta lehenengo aldiz orain arteko kultura politikoari buelta emateko bidea martxan ipini dute. Politika egiteko beste modu bat posiblea badela erakusten hasiak dira eta auzokideak oso eskertuta daude.