Sopelako Ezker Abertzaleak udan herrira heltzen ari diren turistei ongi etorria emateko esaldi hau aukeratu du. Uztailetik materiala banatzen ari dira eta toki estrategikoetan pankartak eta kartelak ipini ditu.

Ingelesaz, frantsesaz eta erderaz, turistak Euskal Herrian daudela ohartzeaz gain, herri honetan bizi den gatazka politikoaren zergatia azaltzen die. Ekimen propagandistiko honekin ere uda honetan gure herrira datozen turistei gure berezitasuna jakinarazi nahi die.

Orain arte kartelak eta mila orri baino gehiago banatu dituzte. Horretaz gain herriko hainbat lekutan “Freedom for the Basque Country” leloa daramaten pankartak ere ipini dituzte baina Ertzaintzak edota Udalak aginduta berehala desagertu dira. “Ez dakigu PSOErentzat edota Sopelako PNVko nagusientzat hemen askatasuna nahi dugula jakinaraztea ere delitua ote den. Irailatik aurrera jokabide honen inguruan Udalean galdegingo dugu eta bere kasuan salaketa gogorra ere egingo dugu” adierazi dute Ezker Abertzalearen bozeramaleek.

Ekimen hau dela eta, Sopelatik pasatu diren turistak aske izan nahi duen herri eder batetan egon direla kontatuko dute.