Zorionak izan da azken asteetan behin eta berriz entzun dugun esaldia. Oraingo honetan,  gabonak ostean, berriro ere esan beharra dago: ZORIONAK!. Zorionak, atzo Bilbora hurbildu ziren guztiei. Berriro ere Bilboko kaleetan zehar preso, errefuxiatu eta iheslarien aldeko jende uholdea geldiezina izan zen. Zahar eta gazte, emakume eta gizon, kolore desberdineko politiko eta eragileak, euskaldunak, atzerritik elkartasuna adierazi zutenak…denetarik topatu ahal izan genuen La Casilla-tik Udaletxerako bidean.

Guztiok gordetzen genituen gure baitan beste urteetako hainbat irudi, beti ere urte hasierako manisfetari ugariren argazkiak eta urteroko zenbakien dantza: 20.000, 40.000, 45.000…Jendetsua izatea espero genuen, hala ere, gaur goizeko egunkarietako argazkiei begiratuta ezin izan dugu irrifarre eta poztasuna ezkutatu.

2011. urteak 365 egun eman dizkigu Euskal Herriko gurpil-zoroan murgilduta egon ahal izateko: bi hauteskunde kanpaina, Bildu eta Amaiurren jaiotza eta emaitza onak, ETAren borroka armatua bertan behera uzteko erabakia, Gernikako Akordioaren sinadura, Euskal Preso eta iheslarien Kolektiboaren adierazpena, Aieten atzerriko hainbat eragileen bultzada eta argazkia… hau guztia mundu mailako krisi ekonomikoa aipatu barik. 365 egun, 8.760 ordu, une honek duen garrantziaz jabetu ahal izateko.

Hala ere begirada guztiek ez dute atzera egin behar; berri asko izan ditugu, argazki asko, manifestari ugari, baina 2012.urtean egin beharreko lana ere handia izango da. Oraingo honetan pixkanaka ereiten ari diren haziak zaindu, ureztatu eta elikatu beharko ditugu. Ezin dugu lan guztia eguneko argazki polit batean bakarrik oinarritu; Euskal Herriak merezi duelako, legalizazioa ezinbestekoa delako eta Preso, errefuxiatu eta iheslari guztiek behar dutelako. Beraz egin dezagun bidea eta eman ditzagun urratsak guztion artean prozesu hau atzeraezina bihurtzeko, 2013ko urte hasierako argazkia beste bat izan dadin.