Honetan be aditua ez naiz. Esaera zaharretan esan nahi dut. Honetan eta beste eta hainbeste kontuetan ezjakinok ezer gutxi dugu esateko. Hiper-espezialisten esku dagoen mundu honetan ez da komeni hemen eta han muturra sartzen ibiltzerik. Kontuz gero.  Laborategian lan egiten duen zientzialari hiper-espezializatuak ez daki alboko gelan nor eta zertan dabilen, are gehiago, bere adarreko ez diren gaiak berari bost.

Politikari aditu eta profesionalek ere berdin. Bakoitzak berean. Artaldearen norabidea zuzen mantentzeko, hedeak trinko eusteko, erakunde publikoetan esperientziadun politikariak behar dira. Espezialistak. Zelan ulertu udaleko dinamikatik kanpo dabilen herritar plebeio batek udal horretako martxa konplikatu eta ulergaitza. Esaterako, zelan ulertu ba… udal bateko aurrekontuak? Noren buruan sartzen da holakorik? Ezetz ba.

Udaleko aurre eta atzekontuak gauza serioegia dira herritar kirten batzuen esku lagatzeko. Zazpi karrera eta hamaika etxeen jabeak, urrezko bizarra eta diamantezko ezpatadunak. Goreneko espezialista adituak.

Artikuluaren puntu honetan egoki eta dotore luzituko zuen esaera zahar borobilen bat…baina nire goiko kamara ia hutsik, aurtengo 19. Esaera Zaharren txapelketaren zerrenden zain geratuko naiz.

Halandaze, Sopela Aste On! ataleko arduradunek herriko ezjakinengan jartzen duten konfiantza eskertzeagatik, moldatuko dugu Gotzon Dylan Garateren ukitu freskoa daraman Esaera berriren bat:  EZ ZAIO LOTZEN EZ, GOROLDIORIK DABILEN HERRIARI!