Politiko batek irabazten duenaz “morboa” izan ohi da gure gizartean. Noizean behin egunkariek politikoen soldatak “filtratzen” dituzte eta herritarren artean esamesak sortzen dira: “politikoek asko irabazten dutela, zein ondo bizi diren…” Bitxia da gai honen inguruan dagoen isilpekoa edo sekretismoa, soldata hauek guztiz publikoak baitira; beraz, erraza da guztiz diru kopuruak ezagutzea, baita Sopelakoak ere.
Zenbat irabazten du, beraz, Sopelako politiko batek? Hemen dituzue gure Udalean dauden soldatak, baloraziorik gabe. Ondorioak, eta diru asko ala gutxi den zuek erabaki…

Sopelako udaletxean bi pertsona daude guztiz liberatuta, alkatea eta alkateordea, eta soldatak hauek dira: Alkaterena 59.711 euro urtean, eta Alkate Ordearena 56.726. (batek 10 milioi pezeta eta besteak 9,5). Bi hauez gain, Sopelako Udalean beste 15 zinegotzi daude, eta hauek ez dute soldata finkorik, Plenoetan eta batzarretan parte hartzeagatik kobratzen dute. Pleno bakoitzeko 225 euro kobratzen da (ohikoena izaten pleno bat hilero) eta komisio bakoitzeko 135 euro (Sopelako Udalean 10 komisio dago: Kultura, Hirigintza, Zerbitzuak, Ogasuna…)
EA, PP eta Berdeek zinegotzi bana dute, eta zinegotzi horiek komisio guztietara joan behar dute (edo joan daitezke), beraz komisio guztietara badoaz 1.350 euro jasoko dute, gehi 225 plenoarengatik, osotara 1.575 euro hilero.
PSOEk 2 zinegotzi ditu, Ezker Batuak (Alternatiba) 3, ANVk 4 (*) eta PNVk 5. Talde hauetako zinegotziek ardurak banatzen dituzte, beraz, gorabeherak badaude ere, batez beste 6 komisiotan edo, hartzen dutela parte esan daiteke. Horrela bada, sei komisioren truke 810 euro, gehi plenoarengatik 225, osotara, beraz 1.035 euro hilero.Ulergarria denez, kantitate hauei egin beharreko kenketak egiten zaizkie (IRPFren taulak aplikatuz) eta abuztuan ez dago plenorik, ezta komisiorik ere, beraz hile horretan ez da kobratzen.
Honez gain Gobernu Batzordeko bilerak daude, hauek hamabostero izaten dira eta bakoitzeko 180 euro kobratzen da. Batzar hauetan Gobernatzen duen taldearen zinegotziek soilik hartzen dute parte (Sopelako kasuan PNVkoek); beraz lehen esandako kantitateari gehitu 360 euro hilero zinegotzi hauentzat.
Partidu batzuetan diru kantitate osoa zinegotziak poltsikoratzen du; beste batzuetan proportzio bat zinegotziarentzat da, eta beste zati bat partidu politikoarentzat; eta esan dezaket inolako zalantzarik gabe Ezker Abertzaleko zinegotziek ez dutela euro bat ere euren poltsikoetan sartzen.
Asko da? Gutxi da?... zuek irakurleok baloratu. Ziurrenik datu bat falta zaizuela: zenbat denbora egiten dute lan zinegotziek komisio horietan? Sentitzen dut horren erantzuna ezin ematea: komisio batzuk oso laburrak direla onartu beharra dago zintzotasun osoz, beste batzuk, aldiz, benetan luzatzen direla. Horrez gain komisioetan eta plenoetan parte hartzeko “etxerako lanak” egin behar dira: herriko eragileekin hartu emanak, teknikoen informeak aztertu, legeak irakurri, baloratu, proposamenak egin e.a… eta hori kuantifika ezina da, nork bere buruaren ardura.
Azken datua: partidu politikoek ere dirua jasotzen dute, baina burua zenbakiez ez itotzeko, gai honetaz beste artikulu batean arituko gara… “morboa” manten dadin.
(*) ANVk 4 zinegotzi ditu Sopelako Udalean, baina ANVk salaketa publikoa egin zuenez, Partiduen Legea, apartheid eta trikimailuz erabiliz zinegotzi bat lapurtu zioten