Ostiral honetatik aurrera eta uztailaren 11 bitartean, egunkari, irratsaio eta telebista guztietan Futbol Mundialari buruzko berriak aterako dira etengabe, eta hori gutxi balitz, Espainiako Selekzioa behin eta berriz izango dute abiapuntu. “ La roja” diote, badirudi gure Euskal Herri honetan ez daukagula beste aukerarik gorri kolorea daraman selekzioa gurtzea baino. 11 jokalari, 11 kamiseta, hamaika aukera modu fin eta ea oharkabean Espainiako identitate bateratu eta zapaltzailea gure artean errotuta gera dadin.

Hara beste 11 arrazoi Euskal Herri Gorria aldarrikatzeko:

1.Gorria historikoki kolore iraultzailea izan da. Ezkerreko mugimendu eta iniziatibekin erlazionatu dena.
2.Gorriak pasatuko ditu orain telebistaren aurrean lasai-lasai dagoen langilea, Kapitalak sortu duen krisiak bere aurpegirik bortitzena erakutsiko digunean.
3.Bankuek, krisiaren aitzakiaz jasotako milaka eta milaka euroak non daude gaur egun? Noiz ikusiko da nolabaiteko eragina banku horien bezeroak garen herritar guztien kontu korronteetan?
4.Zapatero Jaunak agindutako laguntza guztiak “ahuntzaren gauerdiko eztula” bihurtu dira Europak eta bere atzean dauden lobbiek nolabaiteko presioa egin bezain pronto.
5.Non dago Euskal Marko ekonomikoaren malgutasun, independentzia eta erabaki propioak hartzeko aukera?
6.Azken aldian langabezia da gorantz doan uholde bakarra; enpresetako espedienteak, azpi-kontratazioak, kaleratzeak, prekarietatearen aparrekin batera.
7.Sektore publikoen hondoratzea; bai hezkuntzan, bai osasun arloan pribatizazioa egunerokoa dugu.
8.Aberastasuna modu egokian eta justuan banatzeko beharra dago, zerga politika bidezkoa bultzatuz.
9.Pentsio sistema eta urteetako borrokaren ondorioz lortu diren langileen eskubideak bermatu behar dira.
10.Dekretu bidez onartuko duten lan erreformaren aurrean altenatibak egon badaude, langileentzat onuragarri direnak eta guztien artean eztabaidatu beharrekoak.
11.Beharrezkoa dugu Kapitalaren aurkako partidu honetan aurretiaz sartutako bi golen atzetik hirugarrena etortzea, ekainaren 29an langile bat ere bere laneko “bankiloan”  gera ez dadin.

Beraz baditugu hamaika arrazoi kalera atera eta ozen oihukatzeko: GORA EUSKAL HERRIA GORRIA!!! HORI BAI GURE GORRIA!